تاکی دے دے وِچ بدل
٭٭٭٭٭٭٭٭٭٭٭٭٭٭٭
تاء دھمی دے سِجھ دی
بھا رَتـڑے نیـناں دی
وا وِچھڑے ݙیساں دی
مَدھ وِسرے خاباں دی
کنسو ڳُجھیاں رمزاں دی
کݨ مݨ لنگھدے ݙینہاں دی
گھڑمس ساوݨ دی چھاں دی
ایہہ وَن سَوَن جیوݨ ھِے
جیوݨ ہِک مک تھیوݨ ھِے
اِتھاں وِچھڑن نال مِلݨ ھِے
اِتھاں سنگت وِچ وِچھڑن ھِے
اِتھاں مَنݨ تُوں پوند مناھی
تے نفی دے وِچ رانجھݨ ھِے
اِتھاں ݙیوں وِچ گِھنݨ ھِے
اِتھاں مَرݨ دے وِچ جیوݨ ھِے
اِتھاں کَس وِچ ساری چَس ھِے
ـ ٻئی ہَر ہِک شے خَرخس ھِے
اِتھاں ݙُکھ سانبھݨ دی رُت وِچ
مٹھے یار دی پرِیت دا رَس ھِے
اتھاں جو نظـر آوے کُوڑ اے
جو اوہلے ھے اوندی تَس اے
اِتھاں نینـاں وِچ سُفنے ہِن
اِتھاں سُفنے وِچ نیناں ہِن
اِتھاں گُھپ اندھارے سوجھلا
اِتھاں چِٹے ݙینہہ راتیں ہِن
اِتھاں جاگ سمھݨ اکھواوے
اِتھاں سمھݨ دے وِچ گھاتاں ہِن
اِتھاں میں تے تُوں گُم تھی ڳئے