ہِک نِینگِر سُگِھڑ سیاݨی کُوں
میں ویندا ݙِٹھم پاݨی کوں
گھڑا کُچھڑ چاتی ویندی
حُٻ دی چادر پاتی ویندی
شرم حَیؐا دا اوچھَݨ ڄَیندا
پِیت پیار دا بوچھَݨ ڄَیندا
زُلفاں مُشکی وَل وَل والیاں
کالے نانگ دے وانگوں کالیاں
گردِن مور دے کار ہئی ڄَیندی
ـ ٹور کَبَک رفتار ہئی ڄَیندی
دِلکش مُنہہ مہتابی چِہرہ
جَیندا صاف کِتابی چِہرہ
نَک کُنڈھی تلوار ہا ڄَیندا
مَن موھݨاں مُسکار ہا ڄَیندا
ـ ݙند موتی دے داݨیں ہانِس
نَقش سبھے مَن بھاݨیں ہانِس
ہَتھیں وِچ تقدِیر رکھیندی
دُشمݨ دا ہاں چِیر رکھیندی
صَب٘ر وفا دا مَن ہا ڄَیندا
خاص جفاکَش تَن ہا ڄَیندا
ـ ٻان٘ہاں دے وِچ زور خُدائی
شیر دی زوجہ ڄَٹی مائی
تھوݙ غُلابی چولے وَیندی
آپ مُرادی ٻولے وَیندی
پاݨی بَھر تے گھر ݙو ویساں
روٹی چا تے وَر ݙو ویساں
وَر ہِے میݙا سِدھا سادا
وَر میݙا عِزت دے ݙا دا
وَر ہِے میݙا،میں ہاں وَر دی
وَر ہِم آقا ، میں ہاں بَردی
وَر ہِے میݙا ناز وَطن دا
 وَر میݙا جــان٘بــاز وَطن دا
**********************