ساکُوں ساہ دی سُدھ ھُݨ آئی اے،ھُݨ جِیوݨ جوت جگائی اے
اَساں اپݨی واٹ ھُݨ وَلسُوں،پیریں اپݨے آپ اَڄ چَلسُوں
ـ ݙِیوے اَندَر آپ اساں ٻلسوں،ساݙی کَچھ وِچ لوک لُکائی اے
ساکُوں ساہ دی سُدھ ھُݨ آئی اے،ھُݨ جِیوݨ جوت جگائی اے
ساری عُمر لدھی ھِک ڳالھ اے،اللہ لوکی سَبھ بَھئی وال اے
پِیلھُوں اپݨیاں اپݨی ڄالھ اے ، ویڑھے تُلسی اَڄ مُسکائی اے
ساکُوں ساہ دی سُدھ ھُݨ آئی اے،ھُݨ جِیوݨ جوت جگائی اے
اَساں رمز لدھی ھُݨ جِیوݨ ، بَٹھ زھر پیالا پِیوَݨ ـ
رَلے ھِیݨیاں رَل تے جِیوݨ،اِیہا خلقت راز خُدائی اے
 ساکُوں ساہ دی سُدھ ھُݨ آئی اے،ھُݨ جِیوݨ جوت جگائی اے