سِیندھاں مانگھاں خواب اساݙے
شیشے کنگھیاں خواب اساݙے
خُشبو میندھیاں خواب اساݙے
تَیں بِن عیداں خواب اساݙے
کہیں دیاں چُنیاں چولیاں چُوڑے
کہیں دیاں ونگاں خواب اساݙے
خواب تھئے سُرخ گُلاب دے قِصؐے
کھیر چمبیلیاں خواب اساݙے
ساݙے چِہرے مِٹی گارا
ساݙیاں شکلاں خواب اساݙے
اَکھیں ساݙیاں خواباں دے گھر
پِپلیاں پلکاں خواب اساݙے
تاج محل ھوسِن سو ھوسِن
سالھ سفِیلاں خواب اساݙے
شالا تیݙے شَہر پئے وَسِن
وَسدیاں وَستیاں خواب اساݙے