تریمتیں دی آزادی دا ڳاوݨ
تِلڳو توں ترجمہ
دھمی تِھیوݨی ھِے،نُور آوݨا ھِے
اَساں باغ بہشت وساوݨا ھِے
رات ھَنڈݨی ھِے،ݙُکھ مُکݨے ھِن
اَساں رَل کے مَچ مَچاوݨا ھِے
اَساں تَند تَند تھی کِھنڈݨا نہیں
رَلے وُݨـنا ھِے،رَلے پاوݨا ھِے
پتر جھڑ وَنڄن،ھاڑ سیک سَہِن
مین٘ہہ وَسݨا ھِے،ساوݨ آوݨا ھِے
اَساں دِل وِچ آساں پالیاں ھِن
پاݨی شوق دا اِنہاں کُوں لاوݨا ھِے
نہیں کِھمݨیاں تُوں کوھسار ھلدے
بھوئیں مُونجھدی نہیں تلے ھَڑ،چھل دے
اَساں جوڑ کماݨ اِرادے دی
سِجھ چندر تے تِیر چلاوݨا ھِے