آ ئے مَست ݙِھاڑے ساوݨ دے
واہ ساوݨ دے مَن بھاوؑݨ دے
بدلے پُورَب ماڑ ݙَکھݨ دے
کَجلے بُھورے سَو سو وَن دے
چارے طرفوں زور پَوؐن دے
سارے جوڑ وَساوَݨ دے
چکویاں چکوے،اَغن پَپِیہے
کوئل،مور چَچوݨے چیہے
سہنس،چکور،چنڈُور ٻَٻیہے
شاغل گیت سُݨاوَݨ دے
ـ ݙیہاں، پِین٘گھاں،ساویاں پِیلیاں
راتیں کِمݨیاں کھمݨ رسیلیاں
گَج گَج گاجاں گَجِن رسیلیاں
وقت سِنگھار سُہاوَݨ دے
اوھی راوے تَھیاں گُلزاراں
تھل چِترانگ وی باغ بہاراں
گھنڈ تواراں بارش باراں
چرچے دھاوَݨ ڳاوَݨ دے
چاندݨی رات مَلہاری ݙینہہ ھِے
ٹھڈڑیاں ہِیلاں رِم جِھم مین٘ہہ ھِے
سوہݨی موسم لَڳڑا نِین٘ہہ ھِے
ـ ڳئے ویلہے غم کھاوَݨ دے
مُد مَستانی تے خُوش دِنڑے
سالہوں سوھے کیسر بِھنڑے
سہجوں مین٘ہہ برساتوں سِنڑے
جَھڑ ڳئے لانگھے لاوَݨ دے
وِین٘ہہ فَرِید آباد تِھیوسے
مال مویشی شاد تِھیوسے
دِل دَردوں آزاد تھیوسے
چولے ان٘گ نہ مان٘وَݨ دے
**********************