آ مِراسݨ،سِہرے آکھوں،اُوں بُھورل دے

 

ـ ڄیہڑا ساݙی وَستی دا ھِے لَیلَݨ ڳَبھرُو

 

ڄَیندے حُسن دے ھوکے

 

ـ ݙیس سرائیکی دے وِچ

 

ـ ݙیکھ مِراسِݨ،بھولا بُھورل کِیں پیا ݙِسدئے

 

ـ ڄیویں ھووے نِسریا ٻُوٹا سرمی دا

 

رَنگ ءِس ایویں،ڄیویں چاندَݨ کَچھی دا

 

تَن ھِے نَرم مُلائم،مَکھݨ مَنجِھیں دا

 

اَکھیں مُلخ مَلہِیر دے ٹوبھے

 

ـ ڄِتھاں اَزل دے پیاسے پَکھی واس پَندھیڑُو

 

رُوح دی تَریہہ لَہاوِن

 

مُسکے تاں ایں چاندَݨ تِھیوے

 

ـ ڄِیویں پَربھ دِیاں راتِیں دے وِچ،مومل ویس وَٹاوے

 

یا وَت، پِینگھ تے تَن لَسکاوے

 

ـ ٻولے تاں ٻَس ایویں لَڳدے

 

ـ ڄِیویں سِندھ دریا دی مَݨ تے

 

وَنجھلیاں وَڄدیاں ھووِن

 

ساوَݨ مان٘ہہ دی وُٹھڑی روھی دے سَب مَنظر

 

اِیندے رُخساریں وچ مِلدِن

 

چال ٹُرَݨ دی،وَکھرے وَن دی

 

ـ ڄیویں ٻَل ھَرَݨ دا

 

تَھل چِترانگ دے صَحن تے

 

خُوش تھی پوں پوں ݙیندے

 

اِیندے سانگے سِکدٔین،لالُو لاڑ دیاں جھوکاں

 

ڄِتھاں ٻُوئی،کِھپ،کھار سِہن٘واراں،ڈھولے ڳاوِن

 

پِیت پِرَم دے بھیت ݙَساوِن

 

اِے راول اِے خان پُنَل ھِے

 

اِیندے نقش قدم تے رُلدٔین،کئی سَمّیاں کئی سَسؐیاں

 

اِیں راݨے دے مُنہہ تے پوندی

 

ناں ناں سومَل،سونی،ناں وَت گُجر، گام

 

ساریاں روندین کاک کَندھی تے

 

آ مِراسِݨ سِہرے آکُھوں ـــ

 

توڑیں تیݙے ساݙے گھریں بُکھ دے پارھے

 

توڑیں ساݙے وَسدے ساکوں نِیچ سَݙیندِن

 

وَت وی ساݙیاں رسماں رِیتاں وَکھرے وَن دیاں

 

کُئی پرنِیچے تیݙا ساݙا کَم مِراسِݨ،سِہرے آکھن