آ چُݨوں رَل یار ــــ پِیلھوں پکیاں نی وے

کئی بَگڑِیاں کئی ساویاں پِیلاں،کئی بُھوریاں کئی پِھکڑیاں نِیلیاں

کئی اُودیاں گُلنار ، کٹویاں رَتیاں نی وے

ـ ٻار تھئی ھے رشک اِرم دی،سُک سَڑ ڳئی ڄَڑھ ݙُکھ تےغم دی

ھَر جاء ــــ باغ بـــہـــار ، ساکھاں چَکھیاں نی وے

پِیلھوں ݙیلھیاں دیاں گُلزاراں،کہیں ڳل ٹورِیاں کہیں ڳل کھاریاں

کئی لا ٻیٹھیاں بار ، بھر بھر پَچھیاں نی وے

ـ ڄال ڄلوٹے تھئی آبادی،پَل پَل خُوشیاں دم دم شادی

لوکی سہنس ھزار ، کل نے پَھکیاں نی وے

حُوراں پَریاں ٹولے ٹولے،حُسن دیاں ھِیلاں بِرھوں دے جھولے

راتِـــیں ٹھڈیاں ٹھار ، گو لوئیں تَتیاں نی وے

رَکھدے ناز حُسن پرور دے،اَبرُو تیغ تے تِیر نظر دے

تیز تِکھے ہَتھیار ، دِلیاں پَھٹیاں نی وے

کئی ݙیون اَن نال برابر،کئی گِھن آون ݙیڈھے کر کر

کئی ویچن بازار ، تُلیاں تَکیاں نی وے

کئی دُھپ وِچ وی چُݨدیاں رھندیاں،کئی گِھن چھاں چھنویرے ٻہندیاں

کئی چُݨ چُݨ پیاں ھار ، ھُٹیاں تھکیاں نی وے

ایݙوں عِشوے غمزے نخرے،اوݙوں یار خیرائتی ٻکرے

کُسَݨ کاݨ تیار ، رانداں رَسیاں نی وے

پِیلُھوں چُݨدیاں بوچھݨ لِیراں،چولا وی تھیا لِیر کَتِیراں

گِلڑے کَرِن بچار ، سینگیاں سَکیاں نی وے

آیاں پِیلھُوں چُݨن دے سانگے،اوڑک تَھیاں فریدݨ وانگے

چھوڑ آرام قرار ، ھَکیاں ٻَکیاں نی وے

Be first to comment this article

Only registered users can write comments.
Please login or register.