|
مُکاݨ ـ
1
ساݙی اصلوں بھوئیں ھِ بھاڳ سَڑی
جَین٘دے ہَر واسی دے ڳَل وِچ ہِن
کئی ڳَیڑ ڳلاویں عُمراں دے
2
ہَر وَسدا ایویں جِیندا پئے
جیویں جیوݨ کُوڑ ملام ہووے
ھِ لہُو دی چَھل ہَر جاء ہَر پَل
ہَر خواب عذاب دے گھیرے وِچ
کَئی سانگاں چُبھدیٔن زیرے وِچ
3
ہِن آساں اوتریاں بے وِتریاں
ہَر اکھ دے صحن ءِچ پٔن وِتریاں
کوئی سانگا سُکھ دا ݙِسدا نئیں
دِل کہِیں منظر تے وِسدا نئیں
4
اَساں کنڈوراݨے لوک ہِسے
اَساں اپݨی اُڄڑی جھوک ہِسے
ساݙے لیکھے کیا اَساں لیکھ سَڑئے
ـ ٻیا کیا آکھوں؟ اَساں سَیت مُٹھے
5
ساݙی روھی غیریں ہاٻ تھئی
ساݙے تھل دے ٹِٻڑے اوپریٗں ہَتھ
ساݙے ٻیٹ تے وَحشت آݨ لَتھی
ساکُوں دان دمان دی غُربت تھئی
6
ہِک درد شِناس دا لانجھا ہا
ساݙا ہوندا درد جو سانجھا ہا
جیرھی درد دے مُلخ دی شہزادی
جَیں آپݨے اوپریٗں لوکیں دے
نِت غَم وَڑنجے، نِت ݙُکھ چاتے
7
جیکُوں سُدھ ہائی، مَوت دی سِک ہائی پئی
اُوندا قدم قدم تے موت موئی
راہ بھالئے، اِستقبال کِیتٔے
8
جَیں آکھیا ہا او ساݙا نئیں
جیرھا سَچ دے راہ وِچ قَتل نئیں تھیا
جیرھا قتل تھیا اُوں تُوں سِـر صدقے
سِندھ دھرتی دی دھی سِندھڑی دے
اَساں اُوں مظلُوم مُسافرہ دے
پَل پَل ہَر وقت مُکاݨی ہَوں
پَل پَل ہَر وقت مُکاݨی ہَوں
**************
 Add as favourites (17) |  Quote this article on your site
Only registered users can write comments.
Please login or register. |
Poetry 
