یقِین ہِم ہاکڑہ وَہسی

ولا، بھوئیں بھاڳ وند تِھیسی

رِزِق ڄَمسی،بے بہا ڄَمسی

وَلا فصلاں کُن٘واریں بَن

تے خُوشبوئیں کُوں تَن تے ویڑھ

اپݨے سئیں دیاں تانگھاں وِچ

اُسرسِن تے نِسرسن،پُھل تے پَھل چیسِن

ولا اِیں اَترَک دھرتی دی کُکھ تُوں

ساولیں ڄَمسِن

ہَوائیں دستکاں ݙیسِن

تے حُوراں ہاکڑے دِیاں

ہاکڑے دی مَݨ تے آ لَہسِن

اساݙے خواب رادھے ہوئے

پَڄَلدی ریت وِچ سان٘ول

اُنگرسِن ، با ثَمَر تِھیسِن

کَݙاہِیں بے گھری مُکسی

کَݙاہِیں،آپݨی کَنڈ تے

لَݙیاں جھوکاں، لَہا ٻَہسُوں

اِیہے کنݙ تے،لَݙیاں جھوکاں

کَݙاہِیں اَپݨے گھر تِھیسِن

Be first to comment this article

Only registered users can write comments.
Please login or register.