چُوڑا اݨا ݙے جیسلمیر دا

سوھا رنڳا ݙے خاص اجمیر دا

ھووے اصلی خاص مَڑیچا

ناں نقلی وَل پھیر دا

جلدی آوے ناں چِر لاوے

کَم نہیں اِتھ دیر دا

بِرھوں دا چُوڑا پرِیت دا سوھا

کاک ندی دے گھیر دا

بِچھوا بیکانیری گِھنساں

سَڄڑے کَھٻڑے پیر دا

سہجوں پَیساں پا ٹَھمکیساں

تھورا چیساں ݙیر دا

یار فَرِید مَنین٘دم آکھے

کیا غم ٻئے دے وَیر دا

Be first to comment this article

Only registered users can write comments.
Please login or register.