ساݙے پَلے چُکا لَپ ہا،چُنگ چُنگ کر پِٹھیوسے

باقی ویلھا خالی چکی ، ایویں  ٻہہ  گُھرکیوسے

چکی دے گُھرکاٹ تے ساکوں نِندراں گھاٹیاں آیاں

نان٘وݨی خالی ، مات٘ر٘ اِچ  پولا سَکھݨا ٻہہ  پِھریوسے

جھان٘ولی دے وِچ اَٹا کوٹا ہِک جُن٘ڄ توں وی گَھٹ ہا

او وی چھݨ ڳیا انڳلیں وِچوں چھاݨ کوں ٻہہ چَھݨیوسے

ہِک ݙُو روٹیاں ہِک ݙُو مِزمان ہِک  ݙُو  ٻال ٻلوڑے

جاگدے مَن دے سوجھلے مُوجب،ݙِیوا ٻہہ وِسمیوسے

ݙینہہ تے رات مِلا  تے جیویں  ہِکو کَن٘ڳݨی  بَݨدی

چُوڑا ٻانہہ دا ہِک ہِک کر تے سارا بَھن چُھڑیوسے

Be first to comment this article

Only registered users can write comments.
Please login or register.